Kay Kuno Hubog

Posted byanmgasidaynimayokPosted inUncategorized

Mayda mga tawo, kun magtagay patakas

Diri ginhuhuna-huna, epekto ha ira lawas

Bahala waray masalin, kwarta iwawaldas

Bahala waray bugas, kun magmata buwas.

Mayda mga tawo, kun hubog makangaralas

Maaringasa, malabad, danay nagngunguras

Huna-huna mo baltok, kay sige’t pag-in-English

Danay naman tumuok, kun nanunumdom hit ex.

Maupay gad unta kun beer an gintagay

Kay kun imo daupon, diri ka magmamahay

Pero kun tuba ngani, sus Ginoo ko!

Baho malakob-lakob, mayor pa’t inidoro.

Mayda naman iba nga danay makalilipay

Mahubog na ngani, nauli, napahuway

Diri nagsisinamok, diri nakikipag-away

Kay ha tiyan man diri ha ulo, ginsulod an tagay.

Okay gadla magtagay basta responsable la

Mahubog na ngani, sakto na, undangi na

Puyde ka man bumuhat, pasangil nga ma-ihi

Ayaw na pagsarit, ha balay diretso uli.

Published by anmgasidaynimayok

Mario “Mayok” Narrido is a native of San Miguel, Leyte and the first-born among four siblings. Raised from a humble family, he grew up making money on his own to upkeep his studies. Aside from making his classmates’ projects and by joining all the contests at school, he also joined several siday writing contests just to earn money. When his first siday entitled ‘Demand-Driven nga Statistika, Aton Kinahanglanon’ won the grand prize title during the 19th National Statistics Month ‘Siday’ Writing Contest in November 2008 held at the Philippine Information Agency, Regional Office 8, Tacloban City, he then fell in love with siday writing and decided to write more. Thus, this masterpiece.

Leave a comment

Design a site like this with WordPress.com
Get started