Usa kagab-i, nag-inop ako ha imo
Sapit kita panhigda pero duro’n pagtinu-ok mo
Mabug-at ha ak dughan nga nakikit-an ko
An taktak han im mga luha, baga’t natutusok ako.
Nagpakiana ako ha im, “Kay ano nagtutu-ok ka?”
Imo baton ha akon, “Bisan diri, inaano ka ba?”
Yakan mo diri ka nagtutu-ok, ginsisip-on ka la
Ngan humuring ka ha akon, “Buwas mauli ka na.”
Ako hin napa-usa ngan ha imo pumakiana
“Gin-aano ka, may problema ba kita?”
Waray ka bumaton pero sige gihap ‘tim tu-ok
Diri ak nakakaintindi ngan tigda lak nahadlok.
“Iba-ibahan ka na”, yakan mo ha akon
Nakalasan ako, waray makabaton dayon
“Ano’t problema naton?” pakiana ko ha imo
“Di talaga ako maaram kun ano’n nabuhat ko.”
Kun mayda la pulong nga malabaw pa hit gugma
Asya ka hiton ha akon ngan diri na mapapara
Tikang pa han una nga ikaw akon nakilala
Waray na’k lumingi ha iba, hinigugma ikaw la.
Kun ako man nagsayop ngan ha imo nakasala
Pagyakan gad ha akon, pag-istorya kita’n duha
Kay bisan la tubig it nagawas ha imo mga mata
Nasasamad it akon dughan, kun nagtutu-ok ka.
AN MGA SIDAY NI MAYOK 