Kahidlaw

An kahagkot han panahon, danay inaabat ko

Labi na kun na-uran ngan nag-uusahan ha kwarto

Kahidlaw hit ak pamilya, diri ko malikayan

Nagpipinanhuna-huna, kay tungod hirayo man.

Kun aadto ha trabaho, nangangalimot kadali

Pero hihidlawon na liwat ha oras hit pag-uli

Pamilya ha probinsya, kumusta na daw?

Na-aabat ba gihap nira it akon kahidlaw?

Dudrungan nga pangaon, bahala waray sura

Usa han mga butang nga akon gin-uungara

Diri ako maaram kun san-o daw la mauutro

Aanhon ko man kay nag-uusahan man ako?

Pastilan kun puyde la nga di ak manrabaho

An mag-inukoy ha probinsya, asya’n pipili-on ko

Pero mag-aano man kay pobre manla ako?

Pagsuporta ha pamilya, asya’t obligasyon ko.

An mahirayo ha pamilya, diri gad masayon

Kahidlaw ngan kakapoy, kinahanglan antuson

Baman kun ha ka-pobre, baga makatalwas na

Waray na gud adlaw nga ako mag-uusahan pa.