Ikaw gud la iton akon kinabuhi
Han imo pag-abot nagsayon an magkuri
An tanan nga butang nga diri permanente
Baga-baga hin tu-od, aanhi na gud pirme.
Hadto’n waray ka pa, ako in mamingaw
Ha akon mga sangkay, di ak nakikighimangraw
Pero han imo pag-abot, baga dagos la gayud
Nakig-karukayakan an cute ko nga simod.
Kun hadto maisog ako, yana diri na
Bisan di ak naayon, pirme ak natawa
Ha mga tawo nga budlot, diri na’k napupungot
Labi na kun aada ka, ngan baga mahamut-hamot.
Hadto siring nira, hahalot daw ako
Diri gud nahatag, bis’ usa ka sentimo
Pero yana nga aada ka, baga-baga ak hin riko
Bis waray ig-arakos, naduhol na gud ako.
Kun namamati ka man, gusto ko nga imo mabaruan
Ngatanan nga nagbag-o, ikaw gud an hinungdan
Bumaya ka ngani, diri ako maaram
Kun niyan o buwas, imo pa’k makit-an.
AN MGA SIDAY NI MAYOK 