Daw Gugma

Ngatanan nga pag-antos, mayda katapusan

Ngatanan nga kasakit, mayda katubtuban

Sugad man hit tawo nga mabalik ha abo

Gugma mawawara kun waray pagtimangno.

Maabot iton adlaw nga imo ako pamimilngon

Mayda manta oras nga mimingawon ka ha akon

Bisan ha hangin, ighuhuring mo ako

Pero ha inop nala ako mabalik ha imo.

Akon igin-saad nga ikaw la it hihigugmaon

Pero kay ano nawara man an pagtapod mo ha akon?

Ha kada mo pag-isog, kasingkasing ko nasasamad

Waray na ba pulos ha imo an akon mga ginsaad?

Ginbaliwaray mo la an gugma nga ginsaru-an

Ginkaragan mo la an ka-seryoso han ak dughan

Duro an im pangabugho ha akon mga sangkay

Ngay-an kay may iba na, ha imo nagpapalipay

Di ko ikaw mababasol kun kay ano nagsugad ka

It ak ginbabasulan, kay ano an ginhigugma ikaw pa.

Kun unta ini nga gugma ginhatag ko ha lain

Bangin malipayon pa yana it akon kasingkasing.

Pero aanhon ko man kay di man napupugngan?

Nga ikaw it iguli-at hini nga akon dughan

Bisan ano pa nga sayop it imo buhaton

Magpapabilin nga ikaw la it hihigugmaon.