Kabido hini nga ak dughan, waray kawawara
Nahihi-ubos la gihapon ako hasta yana
Pakiana ko ha imo kay ano nagbag-o ka?
An aton kamagsangkay, baliwaray na ba?
Waray man ako ginbuhat nga maraut ha imo
Pero kay ano nga ginsugad mo man ako?
Mayda ba’k nabuhat nga ginkasina mo?
O nakakaminos ka la hit ak pagkatawo?
Makuri mapapas it kasakit hit ak dughan
Gasi ko ikaw an sangkay nga ak matatapuran
Bisan anhon ko pagwara ha ak huna-huna
Tanan nga ginbuhat mo, diri napapara.
May nadag-an ka ba han im mga ginbuhat?
Grabe ba nga kalipay it imo gin-aabat?
Damo na ba it tawo nga gindadayaw ka?
O makarit-karitan ka na ha pagkita nira?
Gasi ko di mauutod an at kamagsangkay
Pero han mga natabo, duro’n ak pagmahay
Kay ano ikaw pa an akon gintapuran?
An at kamagsangkay, imo la ginkaragan.
AN MGA SIDAY NI MAYOK 